अजिंठा अंधारी मध्यम प्रकल्प हा वाघूर नदीवर अजिंठा गावाच्या दक्षिणेस बुलढाणा रोडवर सुमारे ३ किलोमीटर अंतरावर असून सन १९८४ मध्ये प्रकल्पाचे काम पूर्ण झाले आहे. प्रकल्पाची पूर्ण जलाशय पातळी ८. ४३ दलघमी असून पूर्ण जलाशय पातळीचा निव्वळ साठा १. ६५ दलघमी, तर मृत साठा ०. ८८ दलघमी इतका आहे. प्रकल्पाच्या सांडव्याची लांबी ३०० मीटर असून सांडव्याचा संबंधित विसर्ग ७८१.१७ घमी / सेकंद इतका आहे. प्रकल्पांतर्गत ५.२ किलोमीटर लांबीचा उजवा कालवा असून त्याची विसर्ग क्षमता १.७२ घमी / सेकंद इतकी आहे. कालव्याची सर्व बांधकामे १९८४ पूर्वीच पूर्ण करण्यात आली आहेत. 

मात्र, मुख्य कालव्याची अनेक वर्षांपासून दुरुस्ती झालेली नसल्याने कालव्याची वहन क्षमता कमी झाली होती. त्यामुळे कालव्याचे अस्तरीकरण करणे, भराव दुरुस्ती करणे, कालव्यावरील विमोचक दुरुस्ती करणे, तसेच कालव्यावरील नाला क्रॉसिंग व रोड क्रॉसिंगची दुरुस्ती करणे आदी कामे प्रस्तावित करण्यात आली होती. सदर कामे पूर्ण झाल्यानंतर कालव्याची वहन क्षमता वाढून पाण्याची गळती व अपव्यय कमी होण्यास मदत होणार आहे. तसेच अवर्षणग्रस्त, दुष्काळी भाग व डोंगराळ भागातील शेतकऱ्यांना सिंचनासाठी पाणी उपलब्ध होण्यास मदत होईल.